MAGSCH ÖPPIS ÜBER WYY LEHRE?
Vil ds vil Spannends ha ni mit de Diplomlehrgäng WSET 1 bis WSET 3 über Aabou und Usbou vo Wyy erfahre, als dass igs nume für mi wett bhalte. Dä fägig, vergäret Trubesaft isch scho lang meh als nur es Hobby vo mir. Ds Wyywüsse da usse dörft ou e chli eifacher wärde. Drum zielt dä nöi Podcast druf ab, pro Episode eis Thema ds behandle. Um diräkt ir nächschte Folg über nes nöis Thema vor Wyywält ds vinosophiere. Eifach chrüz u quer düre: mal e Trube, de e Machart, druf e Region u när no vil meh. Theme hetts bigoscht gnue.
JEDE SUNNTIG E NÖII FOLG.
U wär das nid scho schwär gnue, chunnt das o no konsequänt i sehr breitem Bärndütsch derhär. Das passt halt eifach ou besser zu mir. Los doch mal dri. Nöii Folge si de immer öppemal ufe Sunntig planet. Dr Sunntig äuä därum, will i schlächt bi mit «ufem Sofa blibe sitze». Ja, Sofa cha ni nid so rächt guet. Und solangs einersits Sunntig isch und s anderersits Mönsche git, wo das hie möge - tja, so lang mach i das itz mal. Wennd s also gärn losisch, de abonnier doch dä Podcast bi dim Aabieter u verzells flissig wyter. U wennds nid so magsch, de schick mr doch eifach e Möbelprospäkt für nes nöis Sofa und teil mr das per Brieftube oder Email mit. Merci dir viumau!
|
|
|
|
|
